Традиционално и оваа година во последниот четврток од месец септември на Улица Македонија  се одржува манифестацијата “Денови на македонскиот мед”. Во наредните три дена, голем број на одгледувачи на пчели и производители на пчелни производи од сите региони на државата ќе понудат разни видови на мед, полен, прополис и други производи од мед, а  граѓаните ќе можат да дегустираат и купат квалитетен мед и пчелни производи  од конвенционалното и огранското  производство. 

Статистиката ни вели дека потрошувачката на мед на годишно ниво по семејство изнесува два килограми, што ни покажува дека нашиот народ нема навика за конзумација на овој здрав, лековит и хранлив производ.

Производителите на мед оваа година ја оценуваат како средно продуктивна со високи приноси само во планинските предели. Иако има капацитет за производство на високо квалитетен како и органски мед и пчелни производи во поголеми количини, нашата држава не може да ги задоволи потребите од сопствено производство па сме принудени да увезуваме мед кој ни од далеку не е со квалитет како домашниот.

 А еве ги и цените кои ги прибележивме, тегла мед (ливадски,шумски) изнесува 350 ден./кг, додека медот во саќе се продава  по цена од 450 ден./кг а органскиот мед се нуди од 400 до 500 ден./кг. Цената за килограм полен рефуз изнесува од 1,300 до 1.500 денари, а може да се купи и во помали пакувања( 50 и 100 гр). Восокот се продава од 500 до 600 ден/кг., прополисот за 3.500 до 4.000 ден/кг.  а еден грам матичен млеч чини од 150 до 200 денари. Исто така на штандовите може да се забележат и разни производи- мешавини на мед со полен, матичен млеч, семе од коприва, ленено семе, ѓумбир, прополис, перга(ферментиран полен), валеријана, нане и др.